ಗಾಂಧಿ ಚಿತ್ರದ ನೋಟು !

ನೋಟು ಬಂತು ಬೀದಿಗೆ

ಮುದ್ರೆಯೊತ್ತಿ ಗಾಂಧಿಗೆ

ಸರದಿ ಜನರು ಬ್ಯಾಂಕಿಗೆ |

ತಿಂಗಳಿಡೀ ಸುರಿದ ಬೆವರು

ದುಡಿದ ಮಂದಿ ಕನಸಿಗೆ |

ಅಕ್ಕಿ,ಬೇಳೆ,ಶಾಲೆ ಶುಲ್ಕ 

ಹೆಂಡತಿ, ಮಕ್ಕಳ ಬದುಕಿಗೆ |

ದುಡಿವ ಮಹಿಳೆ ಗಂಡನಿಗೆ

ನೋಟು ಹೆಂಡ ಮೋಜಿಗೆ |

ಜನನಾಯಕ ಕೊಳ್ಳೆಹೊಡೆದ

ನೋಟು ತುಂಬಾ ಓಟಿಗೆ |

ಸುಂಕವೆಂಬ ಹೆಸರಿನಲ್ಲಿ

ಸೊಂಟ ಮುರಿವ ಜನರಿಗೆ |

ಅಕ್ಕಿ,ರಸ್ತೆ,ನೀರು,ಹೆಂಡ

ಟೆಂಡರು ಕರೆದು ಸೋರಿದೆ |

ನೋಟಿಗಾಗಿ ಮದುವೆಯಾದ

ವರ ವಧುವಿನ ಭಿಕ್ಷುಕ |

ಹಣಕ್ಕಾಗಿಯೇ ಹೆಣವಾಗುವ

ಮಂದಿ ಮಸಣ ಸೂತಕ |

ಹೆಣ ಹೋಗುವ ದಾರಿಯಲ್ಲಿ

ನಾಣ್ಯ ಎಸೆವ ನಾಟಕ |

ಸತ್ತವನ ಹಣಕ್ಕಾಗಿಯೇ

ಬಂಧ,ಬಂಧ ಮಾರಕ |

ವಿದ್ಯೆ ಕೊಡುವ ಶಾಲೆಗಳಿಗೆ

ನೋಟು ವಿದ್ಯೆ ಕರಗತ |

ನೀತಿ ನುಡಿವ ಪಾಠಗಳು

ನಕಲಿ ಸಹಿಗೆ ಸೀಮಿತ |

ಪದವಿಗೊಂದು ಉದ್ಯೋಗಕೆ

ಶುಲ್ಕ ಪಡೆವ ವ್ಯಾಪಾರ |

ಲಂಚ ಕೊಡುವ ಕೆಲಸಗಳಿಗೆ

ಗಾಂಧಿ ನೋಟೇ ಅಪಚಾರ |

ಆಸ್ಪತ್ರೆಯ ದೇಗುಲದಲಿ

ವೈದ್ಯ,ದಾದಿ ದೇವರು|

ಹಣವಿಲ್ಲದೆ ಸತ್ತ ರೋಗಿ

ಹೆಣದ ಸಾಲಿಗನೆಂಬರು|

ಕೋರ್ಟು ಕಚೇರಿ ಮೇಜಿನಲ್ಲಿ

ಅಧಿಕಾರಿ ಸತ್ಯ ಸಭ್ಯರು

ಲೋಕಾಯುಕ್ತದೆಸರಿನಲ್ಲಿ

ನೋಟು ಮುಟ್ಟವವೆಂಬರು|

ಕೂಲಿಯವನ ನೋಟಿನಲ್ಲಿ

ಬೆವರ ನಾತ ಹೇಸಿಗೆ |

ಶ್ರೀಮಂತನ ಜೇಬಿಗಿಳಿದು

ಸುಗಂಧ ಅರಳಿ ನಾಸಿಕ |

ನೋಟಿಗಾಗಿ ಹಲವು ವೇಷ

ಜಗದ ತುಂಬಾ ಜನರಿಗೆ  |

ಬೆವರ ಹನಿಗೆ ಸತ್ಯವಿದೆ

ಅನ್ನ ತುಂಬಿ ಹೊಟ್ಟೆಗೆ |

ಬಾರು,ಕ್ಲಬ್ಬು ರಾತ್ರಿ ಮಬ್ಬು

ಬಿದ್ದ ಹೆಂಡ ನೋಟಿಗೆ |

ಸೊಂಟ ಕುಣಿವ ಬೆಲೆವೆಣ್ಣಿನ

ಬಾಯಿ ತುಂಬ ಮುತ್ತಿಗೆ |

ಅನ್ನಕ್ಕಾಗಿ ಸೆರಗು ಸರಿದ

ಹಾದರ ಹೆಣ್ಣ ಮಡಿಲಿಗೆ |

ಅದೇ ನೋಟು ಪೂಜೆಗೆಂದು

ಗುಡಿ ದೇವರ ಹುಂಡಿಗೆ |

ಊರು ದೇಶ ಸುತ್ತಿ ನೋಟು

ಮಿಥ್ಯ ಸತ್ಯ ನೋಡಿದೆ |

ಕಣ್ಣೀರು, ಬೆವರು,ರಕ್ತ

ನೆಕ್ಕಿ ಸ್ವಲ್ಪ ಮಾಸಿದೆ |

ಸತ್ಯಮೇವ ಜಯತೇ ವಾಕ್ಯ

ಗಾಂಧಿ ನೋಟು ಅಪ್ಪಿದೆ |

ಅನಾಚಾರ, ಅತ್ಯಾಚಾರ

ನಿತ್ಯ ಅದಕೆ ನಡೆದಿದೆ |

ನೋಟು ಬಂತು ಬೀದಿಗೆ

ಮುದ್ರೆಯೊತ್ತಿ ಗಾಂಧಿಗೆ

ಸರದಿ ಜನರ ಬದುಕಿಗೆ |

-ರವಿ ಮೂರ್ನಾಡು