ನಾ ತೆರೆದ ಜಗತ್ತು !

ಎಲ್ಲಾ ಉಳಿಪೆಟ್ಟು ಹಲ್ಲುಗಳು ಕೊರೆದು

ಎದೆ ಕಗ್ಗಲ್ಲ ಸಿಗಿಯಲಿ

ಅಲ್ಲೊಂದು, ಸುಂದರ ಶಿಲ್ಪ ಸೆಟೆದು

ಪೆಟ್ಟುಗಳಿಗೂ ನಗುತಿರಲಿ |

ಊರೆಲ್ಲಾ ಕೊಳಚೆಗಳು ಹರಿದು

ಎದೆಕೊಳಕೆ ದುರ್ವಾಸನೆ ಉಕ್ಕಲಿ

ಅಲ್ಲೊಂದು ಕಮಲ ದಳಗರಳಿಸಿ

ಜೇನ್ನೊಣ ಮಕರಂಧವೀರುತ್ತಿರಲಿ |

ಎದೆಎದೆಯ ಆರ್ತಸ್ವರಗಳು ಮೊರೆದು

ಸಾಂತ್ವನದ ಕಿವಿಗಳ ಹುಡುಕಲಿ

ನನ್ನೆರಡು ಕಿವಿಗಳಿಗೆ ಮಾತ್ರ

ಧಾವಿಸಿ ಸುಮ್ಮನಾಗಲಿ !

ಜಗದಲ ಪ್ರವಾಹಗಳು ನೆರೆಬಿದ್ದು

ಸಂದು ಸಂದುಗಳ ತಡವಲಿ

ನನ್ನೆದೆಯ ಕಾಲುವೆಗೆ ಹರಿದು

ನೊರೆ ಉಕ್ಕಿ ನಲಿಯುತಿರಲಿ |

ಅವರಿವರ ನೋವುಗಳು ಕೂಗೆದ್ದು

ಆಗಸಕೆ ಮೊರೆಯಿಡಲಿ

ಅಲ್ಲೊಂದು,ಎನ್ನ ಮೋಡದ ಹೃದಯ

ತಂಪಾಗಿ ಮಳೆ ಸುರಿಯಲಿ |

ಸುಡುಸುಡು ದೃಷ್ಠಿಗಳು ದುರುಗುಟ್ಟಿ

ತಂಪು ಕಣ್ಣೆರಡ ಹುಡುಕಲಿ

ನನ್ನೆರಡು ಕಂಗಳು ಮಾತ್ರ

ಬೆಂಕಿ ನೋಟಕೆ ಹನಿಯಲಿ |

-ರವಿ ಮೂರ್ನಾಡು

ಚಿತ್ರಕೃಪೆ:ಗೂಗಲ್ ಅಂತರ್ಜಾಲ