ಮನೆಗೆ ಬಂದವರು..!

ಎದೆಯೊಳಗೆ ಕುಳಿತರು

ಮನೆಯವರೆಗೆ ಬಂದರು

ಹೊಸ್ತಿಲಲ್ಲೆ ನಿಂತು ಮನೆಯ

ಅಸ್ತಿತ್ವವ ಅಳೆದರು.

ಹೊಸಿಲು ದಾಟಿ ಬಂದರು

ಮನೆಯ ತುಂಬಾ ನಡೆದರು

ಬಡಿಸಿಕೊಟ್ಟ ಅಡುಗೆಯಲ್ಲಿ

ನೂರು ತಪ್ಪು ಸುರಿದರು

ಕಲ್ಲು ಹೆಕ್ಕಿ ಹುಳಿಯ ಹಿಂಡಿ

ತಟ್ಟೆ ಮುಖಕೆ ಎಸೆದರು..

ಬಿಕ್ಕಳಿಕೆಯೇ ತುಂಬಿದೆ

ದುಃಖ್ಖ ಹೊದಿಕೆ ಹಾಸಿದೆ

ಹೋದವರಿಗೆ ಕಿಟಕಿ ತೆರೆದು

ಮನೆಯ ಕೋಣೆ ಕೊರಗಿದೆ

ಇದ್ದವರ ಬಿರುಗಾಳಿಗೆ

ಮನದ ದೀಪ ಬೆಚ್ಚಿದೆ

ಕರಗದಿರಲಿ ದೀಪರೂಪ

ಜಗದ ಬೆಂಕಿ ಕೋಪಕೆ

ಅಂಗಳದಲಿ  ಮಲ್ಲಿಗೆ

ಮನೆಯ ಒಳಗೂ ಚೆಲ್ಲಿದೆ

ಕೋಣೆ ತುಂಬಾ ದೀಪದಲ್ಲಿ

ನೂರು ಮನಸ್ಸು ಅರಳಿದೆ

ಬೊಗಸೆಯೊಡ್ಡಿ ಬೇಡುತ್ತಿದೆ

ಮನದ ಕಂಬನಿ ಮೆಲ್ಲಗೆ..!

-----------------------------------------------------------

-ರವಿ ಮೂರ್ನಾಡು