ಹುಡುಗಿ ಕಾಮದ ಬಗ್ಗೆ ಬರೆಯುತ್ತಾಳೆಂದರೆ...!

ಹುಡುಗಿ ಕಾಮದ ಬಗ್ಗೆ ಕವಿತೆ ಬರೆಯುತ್ತಾಳೆಂದರೆ..

ಗಂಡಸರಿಗೆ ಮೈಯೆಲ್ಲ ಮಿಂಚು

ತಿದ್ದಿ ತೀಡಿ ಕ್ರಾಪು

ಅಲ್ಲಲ್ಲಿ ಬಿಳಿಗೆ ಮೆತ್ತಿ ಕಪ್ಪು

ಹೆಂಡತಿಗೆ ಒಗ್ಗರಣೆ ಮಾತು !

ಹೆಂಗಸರಿಗೆ ಆತಂಕ !

ಒಂದಷ್ಟು ಕನ್ನಡಿ ಮುಂದೆ ಕೆಲಸ

ಅಡುಗೆಗೆ ರುಚಿ ವ್ಯತ್ಯಾಸ

ಗಂಡಸರ ಹೆಜ್ಜೆಗೆ ಹದ್ದಿನ ಕಣ್ಣು !

ಹುಡುಗಿ ಕಾಮದ ಬಗ್ಗೆ ಕವಿತೆ ಬರೆಯುತ್ತಾಳೆಂದರೆ...

ಹುಡುಗಿಯರಿಗೆ ಹೊಟ್ಟೆಕಿಚ್ಚು

ಕೈಬಳೆ ಸದ್ದು, ಫ್ಯಾಷನ್ ಬಿರುಸು

ಗೆಳತಿಯೊಂದಿಗೆ ತೆಗಳಿ ಪಿಸುಪಿಸು ಮಾತು !

ಹುಡುಗರಿಗೆ ಇನ್ನಿಲ್ಲದ ರಂಗು

ಬೀದಿಗೆ ಬಗೆಬಗೆ ನಡಿಗೆ ನಗು

ಹುಡುಗಿಯರ ಮೇಲೆ ಮತ್ತೆ ಮತ್ತೆ ಕಣ್ಣು

ಖಾಲಿ ಎದೆಗೆ ಪ್ರೇಮ ನಿವೇಧನೆ ಗುಂಗು !

ಹುಡುಗಿ ಕಾಮದ ಬಗ್ಗೆ ಕವಿತೆ ಬರೆಯುತ್ತಾಳೆಂದರೆ

ಅಪ್ಪಂದಿರಿಗೆ ಇನ್ನಿಲ್ಲದ ಮೌನ

ಅಣ್ಣ-ತಮ್ಮಂದಿರಿಗೆ ಕೋಪ

ಹುಡುಗಿಗೆ ಸಿಗುವುದೇ ಮದುವೆ ಗಂಡು ?

ತಾಯಂದಿರಿಗೆ ಒಳಗೊಳಗೆ ಅಳು

ಅಪ್ಪ-ಅಣ್ಣಂದಿರ ಕಟು ಮಾತು

ನಿನ್ನದಲ್ಲವೇ ಸಲಿಗೆಯೆಂಬ ಕೊಂಕು

ಹೆಜ್ಜೆಹೆಜ್ಜೆಗೆ ಕಾಯುವುದೇ ಅವಳ ದಿನಗಳು !

ಹುಡುಗಿ ಕಾಮದ ಬಗ್ಗೆ ಕವಿತೆ ಬರೆಯುತ್ತಾಳೆಂದರೆ

ಮುದುಕಿಯರ ಎದೆಗೆ ಕೊರಗು

ಇವಳಿಗೇನು ರೋಗ?

ಲೋಕ ಹಾಳಾಯಿತು ಮಗಾ....

ಮನೆ ಹುಡುಗಿಯರಿಗೆ ಹಿತೋಪದೇಶ !

ಮುದುಕರಿಗೆ ತೊಡೆ ಬಲಿತ ಉಮ್ಮಸ್ಸು

ಕೆದಕಿ ನೆನಪು ಸುಕ್ಕು ರಟ್ಟೆ ಸಲೀಸು

ನಡೆಗೆ ಲಗುಬಗೆ ಸೊಗಸು !

ಹುಡುಗಿ ಕಾಮದ ಬಗ್ಗೆ ಕವಿತೆ ಬರೆಯುತ್ತಾಳೆ

ಭೂಮಿಯೇ ಅವಳು

ಭೂತಾಯಿ ಮಗಳು

ಸೂರ್ಯನೇ ಅವಳ ಬದುಕಿನ ತಿರುಳು !

-ರವಿ ಮೂರ್ನಾಡು.