ನಿದ್ರೆಯ ಬಾಗಿಲು !

ಬೆಳಕೊಂದು ಕಟಕಟಾಯಿಸುತ್ತಿದೆ

ನಿದ್ರೆಯ ಬಾಗಿಲು |

ದೋಣಿ ಬದಿಗೆಳೆವ

ಹಗ್ಗದ ಶಬ್ದದಂತೆ |

ನೀರೊಳಗೆ ಕೇಳುತ್ತಿದೆ

ಎರಡೂ ಬದಿಯೆತ್ತುವ ಮಾತು

ಪರಸ್ಪರ ವಿರುದ್ದವಾಗಿ

ಅಂಗಾತ ಮಲಗಿದ ಮೇಲ್ಮೈ

ಕೆಳಗೆ ಉಜ್ಜಿದಂತೆ|

ಅಲೆಅಲೆಗಳುಕ್ಕಿ

ನಿದ್ರೆಗೆ ಹೊರಟಿದೆ ಮೌನ

ತೆಳು ಹೆಜ್ಜೆಯಿಕ್ಕಿ |

ಈ ನಕ್ಷತ್ರ ನಕ್ಷೆಯಲಿ

ಮುಂಚೋಣಿಯಲ್ಲಿದೆ ಅಂಕುಶ

ಲಗಾಮಿಲ್ಲದ ಓಟಕೆ

ದಾರಿಯ ಸೂತ್ರವಾಗಿ |

ಎಲ್ಲಾ ವಿಫಲ ಪ್ರತಿಧ್ವನಿಗಳಿಗೆ

ಮುಚ್ಚಿಬಿಡಿ ಕಿವಿ

ಭಿತ್ತಿ ಮೇಲಿನ ಚಿತ್ರಗಳಿಗೆ

ಬಣ್ಣ ಚೆಲ್ಲಿ ಬಿಡಿ |

ಮಂದ ನಕ್ಷತ್ರ ದೀಪದಿಂದ

ತೂರಿ ಬರುವುದು ದಾರಿ |

ಉತ್ತುಂಗದ ಸ್ಥಿತಿ ಚದುರಿ

ಶೂನ್ಯಕ್ಕೆ ಜಾರುತ್ತಿದೆ ತುದಿ |

ಗಾಳಿಗೆ ಕೈಮುಗಿದು ಪ್ರಾರ್ಥನೆ

ತಿರುಗಲಿ, ಕೈವಾರದ ಹುಲ್ಲಿನ ತಂತಿ

ಯಾವುದಾದರೂ ದಿಕ್ಕಿದ್ದರೆ

ಆ ಕಡೆಗೆ ಮಗ್ಗಲು ಮಗುಚಲಿ |

-ರವಿ ಮೂರ್ನಾಡು
ಚಿತ್ರಕೃಪೆ:ಗೂಗಲ್ ಅಂತರ್ಜಾಲ